Uyghur mesilisi türkiye axbarat wasitilirining kün tertipidiki muhim mesililer bilen birlikte tilgha élinishqa bashlidi.
Yéqinqi yillardin béri uyghur diyarida yüz bériwatqan weqelerning köplüki we xelqarada uyghur mesilisining yuqiri kötürülüshige egiship uyghur mesilisi dawamliq halda türk axbarat wasitiliridimu orun élishqa bashlidi. Shenbe küni türkiyening eng chong téléwiziye qanalliridin biri bolghan «xaber türk» téléwiziyiside tarqitilghan «öteki gündem», yeni «yene bir küntertip» mawzuluq programmida uyghur mesilisi küntertipke keldi. Pelin chift riyasetchilik qilghan programmigha türkiyening sabiq dölet ministiri namiq kemal zeybek, dangliq kino yazghuchisi osman sinaw, dangliq shair sülayman chobanoghlu we dölet arxipliri idarisining sabiq mudiri nejati gültepe qatarliq kishiler qatnashti.
22-Dékabir küni axsham 4 saet dawamlashqan bu programmida türklerning ghayisi barmu? eger ghayisi bar bolsa, u néme? dégenge oxshash témilarda munazire boldi. Ular eger türkiye kélechekte küchlük dölet bolsa sherqiy türkistanliqlarni xitaylarning bozek qilalmaydighanliqini ilgiri sürdi. «Böriler wadisi» namliq chatma téléwiziye filimining yazghuchisi osman sinaw ependi yashlar türk dunyasining ortaq tarixi anglitilghan kinolarni köp körse özige bolghan ishenchi ashsa dunyadiki qérindash türkiy milletlerge bolupmu sherqiy türkistanliqlargha ige chiqalaydighanliqini ilgiri sürdi.
